【明報專訊】財政司長陳茂波噚日上晝宣讀《2022/23財政預算案》，下晝出席記者會，有兩段小插曲。陳茂波首度以視像形式宣讀預算案，去到中段網絡好唔穩定，聲音窒窒吓，立法會主席梁君彥需要打斷財爺發言，表示因為線路好似有問題，要請工作人員檢查，宣布暫停會議10分鐘處理。其間選委會界別議員陳曼琪撳咗「舉手」掣，梁君彥以為佢要提出規程問題，陳澄清係撳錯掣。會議前後暫停約15分鐘，復會後財爺嘅網絡連接明顯改善。