【明報專訊】大家平日出入港鐵站，應該留意到通道兩邊，不時貼咗啲學生或非牟利團體藝術家嘅畫作，不過近排全部唔見晒。港鐵前員工、新任立法會議員張欣宇最近收到唔同地區嘅學校校長同社福機構查詢，想佢跟進港鐵嘅社區畫廊點解突然無咗。張欣宇問番港鐵，先知道同牌照有關，原來社區畫廊算係展覽，理應向食環署申請相關牌照，但港鐵一直未有申請。港鐵表示，正檢視畫廊是否涉及領取臨時公眾娛樂牌照，故暫停展示。