【明報專訊】嚟緊星期日係萬聖夜，喺維港海濱亦有萬聖節「期間限定」裝置，包括喺灣仔北就有一個10米高嘅巨型南瓜及南瓜隧道，發展局就推介大家由灣仔北「HarbourChill海濱休閒站」開始行，喺呢個打卡位影完相後，沿海濱向西步行，就會遇到「渡輪碼頭畔主題區」嘅白衣小鬼同「連接添馬至會展海濱長廊Connector」嘅南瓜兔兔，步行約6公里去到「卑路乍灣海濱長廊」，就可以參與萬聖燈飾盛會。而上月新開嘅炮台山「東岸公園主題區」就已被蜘蛛「攻陷」。呢個星期六、日兩條海濱長廊都有萬聖節活動，其中灣仔海濱有畀小朋友參加嘅南瓜大搜尋同快閃嘩鬼團，有興趣者記得上網預先登記。