【明報專訊】自由黨黨魁鍾國斌（Felix）同理工大學合作，研發可防菌殺菌、可重用嘅布口罩已投產，正當大家期待中，Felix話遇到阻滯。Felix噚日喺facebook發帖大叫「死火死火」，話幫口罩做驗測認證嘅公司，同座大廈「有人中咗新病毒（新冠肺炎）」，所以全座大廈要封14日，佢慨嘆「個驗測報告要遲多兩星期才有」，但唔會浪費時間，「生產照做，期望報告一出就即時有數萬口罩」。有網民留言話「禍不單行」，但都有人話「好事必多磨」，又叫Felix搵第二間認證公司。