【明報專訊】後日就係區議會選舉投票日，民建聯噚日喺金鐘添馬公園舉行區選誓師大會，逾百名候選人同支持者齊齊現身，陣容鼎盛。當下社會動盪，黨主席李慧琼率領一眾候選人讀出誓辭，誓言為香港服務、落實「一國兩制」。有唔少候選人一度舉起5隻手指宣誓，望落去同爭取「五大訴求，缺一不可」嘅手勢一樣。主持人見狀立即同大家講「我哋握拳、握拳」，大家先至舉起右手握拳宣誓，避免咗一場「關公災難」，免令人誤會民建聯都支持爭取五大訴求。