【明報專訊】今日係港珠澳大橋通車一周年，過去一年大橋車流量唔達標，政府都要諗吓辦法善用呢條千億大橋。運輸署噚日宣布，粵港澳三地政府同意推出「港珠澳大橋大灣區配額計劃」，等合資格嘅跨境私家車可以通行三地，配合大灣區發展。首階段嘅試驗計劃，係針對6月底已經持有大橋港澳配額、加粵港陸路口岸配額嘅跨境私家車，成功申請後佢哋可以使用粵澳之間新嘅蓮花/橫琴口岸。舉例，合資格私家車可以喺香港經大橋去澳門，然後喺澳門經蓮花/橫琴口岸到內地，再經深圳灣口岸返港。