【明報專訊】反修例運動嘅支持者，表達訴求嘅方法層出不窮，連攞優惠都不忘講口號。話說麥當勞噚日喺facebook專頁出咗個新優惠，只要留言「再3回味」，即送電子優惠券，只需3元就可以買到蘋果批或香芋批（圖二）。個post開咗7個鐘就有逾萬個留言，有人留言「再三回味 光復香港 時代革命 五大訴求 缺一不可 願榮光歸香港」，而專頁管理員都照留言：「$3蘋果批／香芋批優惠券已經Inbox咗俾你～快啲去睇吓啦！」