【明報專訊】反修例風波下，唔少網民近日不滿港鐵，發起「跳閘」行動；Emily噚日路過中大，喺文化廣場見到有部1比1嘅木製入閘機，唔少同學圍住熱議，有人即場試用。入閘機係有同學自發製作，並將製作剪輯成影片，片中同學提到自己好鍾意呢啲入閘機，又見到特首林鄭月娥咁關心入閘機受損，所以決定整番部，強調完全唔鼓勵任何人做犯法嘢。佢約花咗16個鐘製成，話呢部機好安全，例如入閘位用海綿棒整成，撞到都唔怕受傷。呢位同學同Emily講，仲有其他朋友仔幫手一齊整。佢話呢部入閘機係一件藝術品，最主要係希望大家可以多啲關心近日喺港鐵發生嘅事。