【明報專訊】警方早前公布發放伸縮警棍畀休班警員，以便即時介入緊急情况，警察公共關係科高級警司江永祥之前就話使用警棍有嚴格指引，警員唔會拎出嚟玩；不過，呢兩日網上瘋傳有軍裝警員揮舞警棍嘅片段（圖），令人關注警方係咪自打嘴巴。警方噚日話片段攝於舊年2月，同近日措施無關，揮舞警棍嘅係某警署一名駐守槍房嘅警員，所屬警區已跟進事件，承認警員舉措唔理想。