【明報專訊】立法會大樓因七一衝擊事件損毁，直至噚日先解除「紅色警示」，由於大樓仍未維修好，所以傳媒要繼續喺大樓外嘅空地，擺設俗稱「咪兜」嘅採訪位置，以守候進出大樓嘅議員。近日天氣炎熱翳焗，唔少喺咪兜全日守候嘅記者行家都身水身汗，立法會秘書處有見及此，噚日特地購入幾把大牌檔式嘅坐地強力風扇，幫記者降吓溫，十分貼心。有行家大讚風扇力度十足，唔似普通家用風扇，令佢哋喺炎炎夏日下都可以透心涼。