【明報專訊】發展局就快公布「明日大嶼」嘅初步成本估算，Emily噚日去咗香港建築師學會嘅傳媒午宴，「明日大嶼」當然係大家追問嘅焦點。學會新會長李國興（Felix）透露，曾經就「明日大嶼」同發展局長黃偉綸見面商討，目標係聯同香港園境師學會、香港規劃師學會、香港測量師學會下月向政府提交意見書。Felix話，「明日大嶼」係30至50年嘅概念計劃，政府應以新思維、新機制落實，得出願景再做規劃，而唔係「基建行先」，仲要「拆牆鬆綁」。