【明報專訊】年宵聽日開鑼，其中工黨會喺維園開檔，噚日佢哋介紹產品，包括環保袋、鋼飲管同膠紙等，倡議幹事吳敏兒（Carol）話會親自坐鎮，開班教市民用砂糖、橄欖油做簡單手部護理，因糖有磨砂作用，橄欖油就可以滋潤。本身做空姐嘅Carol諗番當年做商務艙，隨餐會奉上細支橄欖油，但有時客人唔用，加上機艙相當乾燥，一班空姐冇乜嘢做就會用橄欖油滋潤吓。