【明報專訊】特首林鄭月娥上任即將一周年，民建聯主席李慧琼（Starry，圖）噚日同傳媒茶敘，佢形容呢屆政府「開局良好，挑戰巨大」，評論林鄭政府之餘，亦回應近日事件，好似近日議事規則委員會討論係咪要對被逐議員加重罰則甚至「不准出場」，Starry話民建聯認同方向，但罰則嘅程度就需要再討論，並舉例指係咪可以探討唔開會罰錢，例如一旦立法會流會，缺席嘅議員罰5000元；如果行為不檢被趕，係咪引用踢波紅牌、黃牌制度，要罰停開會多一次呢？佢就強調呢個建議無同建制派傾過。