【明報專訊】呢幾日天氣酷熱，熱到民主黨前主席劉慧卿又要出動小背心喇。卿姐噚日身穿黑色小吊帶背心出街，喺中環街頭撞到黨友區議員袁海文同鄒穎恒擺街站為黨籌款，卿姐立即同佢哋合照打氣，仲喺facebook分享相片，等大家又可以見到卿姐嘅吊帶背心look。卿姐30幾年前曾經喺TVB做記者，有次著吊帶裙出鏡成為一時佳話；佢喺2016年立法會選舉幫黨友林卓廷拉票時，再次穿著同一條吊帶裙出嚟見大家，引起哄動。