【明報專訊】灣仔藍屋建築群舊年完成活化，負責營運嘅聖雅各福群會收集咗300件藍屋舊物，其中幾十件喺藍屋一個唐樓單位展出，成為一個「舊物敘述空間」，畀導賞團參加者參觀。Emily噚日參觀呢個小型展示館，入面重現收樓時候嘅間隔，600呎嘅唐樓空間有3間板間房，板間房上有閣仔，板間房外有碌架牀，據聞一度住過約40人，展示館保留一個昔日煮飯、冲涼兩用嘅柴房。展示館嘅舊物包括印有5位數字電話號碼嘅電車路線圖同收費表，又有當年居民著過嘅旗袍。