【明報專訊】菲律賓總統杜特爾特噚晚抵港，展開3日私人訪港行程。前年有4名港人喺菲律賓蘇碧灣對開一艘漁船上被捕，被控製毒同藏有約470克冰毒，正被收押；4名港人嘅家屬及立法會議員涂謹申（左一）趁杜特爾特訪港，到菲律賓駐港總領事館遞交請願信，指4人無辜，而且事件拖延近兩年，要求菲總統關注事件及盡快為港人討回公義。杜特爾特聽日會喺郵輪碼頭同菲國民見面，有香港嘅人權組織發聲明表明唔歡迎「暴君」來港，聽日會同本港嘅菲律賓人組織一同示威。而喺杜特爾特訪港前夕，警方喺佢下榻嘅酒店外加設水馬，並出動重點及搜查組同警犬等，喺啟德郵輪碼頭一帶搜查有無可疑物品。