【明報專訊】被DQ嘅姚松炎早前以房產發展研究中心創辦人身分，就太古城一帶提出新規劃建議，包括喺東區走廊近太古海濱一段馬路上，蓋建露天平台作行人專用區同休憩地方，並改劃鰂魚涌公園起合作社房屋，點知建議令個別泛民人士同建制政黨不滿。繼民主黨太古城區議員趙家賢帶頭鬧姚嘅建議天馬行空、令居民感到厭惡，新民黨及民建聯東區支部都唔執輸，噚日分別發聲明批評姚教授嘅建議。