【明報專訊】民建聯周浩鼎早前退出立法會調查UGL專責委員會，以平息政治風波，立法會內委會噚日決定下周五喺內會提名同補選呢個空缺。獨立毛孟靜喺會上指摘建制喺委員會中已經佔多數，要求民建聯唔好諗住個位係「世襲」，搵番自己人出嚟頂替。民建聯蔣麗芸同樣唔客氣，鬧個委員會係吹水會，「無控方、無辯方、無證人，靠乜去查呢？靠想像力呀？」佢又明顯有備而嚟，突然舉出林卓廷同梁繼昌嘅大頭相指摘佢哋，搞到內會又陷入混亂。