【明報專訊】自以為受過良好教育的老好人（即係我），回答這個問題，不會簡單說有或冇。嗱，港女這個名詞，是傳媒創造出來，又或者網民加鹽加醋而成。香港女子，高矮肥瘦，高貴者有，尖酸刻薄又有，怎能用一個標籤，把港女一網打盡。我在大學上通識課時，也常常為港女抱不平。毒男狠批港女患公主病，繪影繪聲，活生生說明港女十大特性，彷彿你在商場隨便一點，就有個港女在你眼前大發脾氣。不公平啊！？我做了幾十年人，真的遇不到一個寫包單係港女的人，唔……直到歲晚這幾天，我在舊區公共屋邨的茶記吃早餐，周末人多，高朋滿座，肥老闆應接不暇。我很喜歡在此飲奶茶，因為肥老闆十分落後，沒有電腦跟單，用筆手寫也懶理，落單清一色「得把口」，腿通餐包熱檸，水吧那邊的師傅唱和，我就是看這幾個伙記口講手做，已經樂了半天。今早大鑊，人太多，肥佬在「唱」order，愈唱愈亂。同枱的港女發難，老是向身邊的男友投訴，「餓死我喇！」她年紀不輕，卻把聲線撚至高尖，似「少女」又不似，男友拿她沒法，叫老闆落單。「等吓啦，靚仔，做唔切呀！」港女拉高聲線：「等咗十分鐘，你想餓死我咩！」老闆身經百戰，回一句：「靚女，你去shopping先啦，返嚟有得食，你唔係好鍾意濕平咩！」說時瞄一瞄枱下邊大包小包的購物袋。跟着一幕，我不能相信我的眼睛。港女怒火中燒，用雙手推男友出去，「你同我打佢！打佢呀！」當然，我回魂之後，理智馬上返晒嚟——也許這是例外，也許她真的肚餓，也許她天性不差，只不過是……事後與世侄女分享這段神奇經歷，她卻笑笑口說，喂，港女的標準description係，佢哋唔會去茶記咁cheap㗎。呢位靚女，肯跟男友捱茶記，都唔錯㗎喇。