【明報專訊】黃色巨鴨Rubber Duck風頭一時無兩，尖沙嘴海運碼頭海旁日日擠滿市民同遊客，唔知係咪出於妒忌呢，本身雄霸尖東嘅短毛肥貓「忌廉哥」，原來偷偷地同Rubber Duck喺青衣船廠影咗輯沙龍鬥可愛。負責接洽兩隻當紅「動物」嘅海港城話，影相當日忌廉哥一見巨鴨即為之傾倒，仲因為掛住𥄫鴨而唔記得望鏡頭，結果足足影咗15分鐘，先見齊忌廉哥同巨鴨正面咋。